ການຄຸ້ມຄອງພະນັກງານ-ລັດຖະກອນໃນກົງຈັກລັດ

ການຄຸ້ມຄອງພະນັກງານ-ລັດຖະກອນໃນກົງຈັກລັດ ສປປ ລາວ

ປອ.ປັນຍາສັກ ແສງອ່ອນແກ້ວ

http://panyasack.blogspot.com

1. ຄວາມໝາຍພະນັກງານ-ລັດຖະກອນ ?

          ພະນັກງານ-ລັດຖະກອນ ແມ່ນພົນລະເມືອງລາວຜູ້ຖືກຮັບບັນຈຸໃຫ້ເຂົ້າເຮັດວຽກ, ເລືອກຕັ້ງ ຫຼືແຕ່ງຕັ້ງໃຫ້ດຳລົງຕຳແໜ່ງໃດໜຶ່ງ ໃນອົງການຈັດຕັ້ງພັກ, ລັດ, ແນວາວສ້າງຊາດ ແລະ ອົງການຈັດຕັ້ງມະຫາຊົນຂັ້ນສູນກາງ ແລະ ທ້ອງຖິ່ນ ຫຼື ໄປປະຈຳການຢູ່ສຳນັກງານຜູ້ຕາງໜ້າ ສາທາລະນະລັດ ປະຊາທິໄປໄຕ ປະຊາຊົນລາວ ຢູ່ຕ່າງປະເທດ ແລະ ອົງການຈັດຕັ້ງສາກົນ ເຊິ່ງໄດ້ຮັບເງິນເດືອນ ແລະ ເງິນອຸດໜູນຈາກງົບປະມານແຫ່ງລັດ.

           - ໃນນີ້ບໍ່ໄດ້ໝາຍຄວາມເຖິງ ທະຫານ, ຕຳຫຼວດ, ພະນັກງານລັດວິສາຫະກິດ ແລະ ພະນັກງານຕາມສັນຍາ.

           - ສຳລັບພະນັກງານອົງການປົກຄອງບ້ານ ໄດ້ກຳນົດໄວ້ໃນລະບຽບຕ່າງຫາກ.

          1.1 ພະນັກງານ ?

          ໝາຍເຖິງ ພະນັກງານການນຳລະດັບສູງ ແລະ ພະນັກງານນຳພາ, ຄຸ້ມຄອງ ທີ່ໄດ້ຮັບການເລືອກຕັ້ງ ຫຼື ແຕ່ງຕັ້ງໃຫ້ດຳລົງຕຳແໜ່ງບໍລິຫານໃດໜຶ່ງ ໃນອົງການຈັດຕັງພັກ, ລັດ, ແນວລາວສ້າງຊາດ ແລະ ອົງການຈັດຕັ້ງມະຫາຊົນຂັ້ນສູນກາງ ແລະ ທ້ອງຖິ່ນ.

          1.2 ລັດຖະກອນ ?

          ໝາຍເຖິງ ລັດຖະກອນທີ່ມີຕຳແໜ່ງບໍລິຫານ, ລັດຖະກອນວິຊາການ ແລະ ລັດຖະກອນຊ່ວຍວຽກບໍລິຫານ ທີ່ໄດ້ຮັບການເລືອກຕັ້ງ, ແຕ່ງຕັ້ງໃຫ້ດຳລົງຕຳແໜ່ງບໍລິຫານ, ຕຳແໜ່ງວິຊາການ ຫຼື ຖືກບັນຈຸເຂົ້າໃສ່ຕຳແໜ່ງງານໃດໜຶ່ງໃນອົງການຈັດຕັງພັກ, ລັດ, ແນວລາວສ້າງຊາດ ແລະ ອົງການຈັດຕັ້ງມະຫາຊົນຂັ້ນສູນກາງ ແລະ ທ້ອງຖິ່ນ.

          1.3 ພະນັກງານນຳພາ ? 

          ໝາຍເຖິງ ພະນັກງານ-ລັດຖະກອນ ທີ່ມີຕຳແໜ່ງບໍລິຫານ, ມີບົດ ບາດນຳພາຄົ້ນຄວ້າ,ກຳນົດແນວທາງນະໂຍບາຍ,ຍຸດທະສາດ, ກົດໝາຍ ແລະ ນຳພາການຜັນຂະຫຍາຍຈັດຕັ້ງປະຕິບັດຢ່າງມີປະສິດທິຜົນ.

          1.4 ພະນັກງານຄຸ້ມຄອງ ?

          ໝາຍເຖິງ ພະນັກງານ - ລັດຖະກອນ ທີ່ມີຕຳແໜ່ງບໍລິຫານ ເຊິ່ງຄຸ້ມຄອງການຈັດຕັ້ງ, ການເຄື່ອນໄຫວວຽກງານ ແລະ ການດຳລົງຊີວິດ ຂອງພະນັກງານ-ລັດຖະກອນພາຍໃນອົງການຂອງຕົນ.

 2. ເງື່ອນໄຂເຂົ້າເປັນລັດຖະກອນ ສປປ ລາວ

        1. ຖືສັນຊາດລາວໂດຍກຳເນີດ ຫຼື ໄດ້ຮັບສັນຊາດລາວແຕ່ ສາມປີຂຶ້ນໄປ.

        2. ມີອາຍຸ ສິບແປດປີຂຶ້ນໄປແຕ່ບໍ່ເກີນສາມສິບຫ້າປີ.

        3. ເປັນພົນລະເມືອງດີ, ມີຄຸນສົມບັດດີ, ມີຄວາມຈົງຮັກພັກດີຕໍ່ລະບອບປະຊາທິປະໄຕ ປະຊາຊົນ.

        4. ບໍ່ເຄີຍຖືກສານປະຊາຊົນຕັດສິນລົງໂທດຕັດອິດສະຫຼະພາບ ຍ້ອນການກະທຳຜິດໂດຍເຈດຕະນາ, ບໍ່ຖືກລົງວິໄນໄລ່ອອກຈາກການຈັດຕັ້ງພັກ, ລັດ, ລັດວິສາຫະກິດ ຫຼື ອົງການຈັດຕັ້ງສາກົນ.

        5. ມີປະຫວັດການເຄື່ອນໄຫວຂອງຕົນເອງ ແລະ ຄອບຄົວທີ່ຈະແຈ້ງ.

        6. ມີວິຊາສະເພາະອາຊີວະສຶກສາ ຫຼື ການສຶກສາຊັ້ນສູງ ແລະ ສອດຄ່ອງກັບຕຳແໜ່ງງານ.

        7. ມີສຸຂະພາບດີ.

3. ໄລຍະເວລາຝຶກງານຂອງລັດຖະກອນໃໝ່

ລັດຖະກອນໃໝ່ຈະເລື່ອນເປັນລັດຖະກອນສົມບູນໄດ້ກໍ່ຕໍ່ເມື່ອໄດ້ຜ່ານການຝຶກງານຕາມໄລຍະເວລາດັ່ງນີ້:

j ຊັ້ນຕົ້ນ ແລະ ຊັ້ນກາງ ຫົກເດືອນ.

k ຊັ້ນສູງຂຶ້ນໄປ ສິບສອງເດືອນ.

4. ປະເພດພະນັກງານ-ລັດຖະກອນ

        ພະນັກງານ-ລັດຖະກອນມີ ສີ່ ປະເພດ ດັ່ງນີ້:

u ພະນັກງານການນຳລະດັບສູງ

    ແມ່ນພະນັກງານນຳພາ, ພະນັກງານຄຸ້ມຄອງທີໄດ້ຮັບການເລືອກຕັ້ງ ຫຼື ແຕ່ງຕັ້ງໃຫ້ດຳລົງຕຳແໜ່ງໃດໜຶ່ງ ແຕ່ປະທານປະເທດລົງມາຮອດຫົວໜ້າທະບວງ ຫຼື ຫົວໜ້າອົົງການລັດທຽບເທົ່າທະບວງ.

v ລັດຖະກອນທີ່ມີຕຳແໜ່ງບໍລິຫານ

  ແມ່ນພະນັກງານນຳພາ, ພະນັກງານຄຸ້ມຄອງທີ່ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງແຕ່ຮອງຫົວໜ້າທະບວງ ຫຼື ຮອງຫົວໜ້າອົງການລັດທຽບເທົ່າທະບວງລົງມາຮອດ ຫົວໜ້າຈຸງານ ຫຼື ຫົວໜ້າອົງການລັດທຽບເທົ່າຈຸງານ (ຕາມທີ່ໄດ້ກຳນົດໄວ້ໃນມາດຕາ 22 ຂອງກົດໝາຍວ່າດ້ວຍພະນັກງານ-ລັດຖະກອນ ສະບັບເລກທີ 025/ປປທ ລົງວັນທີ 28/1/2016)

w ລັດຖະກອນວິຊາການ

  ແມ່ນລັດຖະກອນສົມບູນທີ່ຖືກບັນຈຸເຂົ້າໃນຊັ້ນສາມ, ສີ່ ແລະ ຫ້າທີ່ຮັບຜິດຊອບວຽກຄົ້ນຄວ້າທາງວິຊາການ ແຕ່ຍັງບໍທັນຖືກແຕ່ງຕັ້ງໃຫ້ດຳ ລົງຕຳແໜ່ງບໍລິຫານໃດໜຶ່ງ.

x ລັດຖະກອນຊ່ວຍວຽກບໍລິຫານ

  ແມ່ນລັດຖະກອນສົມບູນ ທີ່ຖືກບັນຈຸເຂົ້າໃນຊັ້ນໜຶ່ງ ແລະ ສອງທີ່ບໍ່ໄດ້ຮັບຜິດຊອບວຽກຄົ້ນຄວ້າວິຊາການ.

5. ຊັ້ນ ແລະ ຂັ້ນຂອງພະນັກງານ-ລັດຖະກອນ

        ຊັ້ນ ແລະ ຂັ້ນຂອງພະນັກງານ-ລັດຖະກອນ ມີ ດັ່ງນີ້:

u  ພະນັກງານການນຳລະດັບສູງຈັດຢູ່ໃນຊັ້ນທີ່ຫົກ ເຊິ່ງມີເຈັດຂັ້ນ.

v  ລັດຖະກອນຈັດຢູ່ໃນຊັ້ນທີ່ໜຶ່ງຫາຊັ້ນທີ່ຫ້າ ເຊິ່ງແຕ່ລະຊັ້ນມີສິບຫ້າຂັ້ນ ການກຳນົດຊັ້ນ ແລະ ຂັ້ນຂອງພະນັກງານ-ລັດຖະກອນອີງໃສ່ ວຸດທິການສຶກສາ, ຕຳແໜ່ງບໍລິຫານ ຫຼື ຕຳແໜ່ງວິຊາການ.

6. ຕຳແໜ່ງບໍລິຫານ ຂອງພະນັກງານລັດຖະກອນ

        ຕຳແໜ່ງບໍລິຫານ ແມ່ນ ຕຳແໜ່ງນຳພາ, ຄຸ້ມຄອງວຽກງານຕາມພາລະບົດບາດ, ສິດ ແລະ ໜ້າທີ່ຢູ່ໃນຫົວໜ່ວຍການຈັດຕັ້ງໃດໜຶ່ງ ປະກອບມີ :

        1. ຕຳແໜ່ງບໍລິຫານຂອງພະນັກງານການນຳລະດັບສູງ.

        2. ຕໍາແໜ່ງບໍລິຫານຂອງລັດຖະກອນ.

        ລາຍລະອຽດແມ່ນໃຫ້ສຶກສາເບີ່ງຕາມດຳລັດ ວ່າດ້ວຍຕຳແໜ່ງບໍລິຫານຂອງພະນັກງານ-ລັດຖະກອນ  ເລກທີ 203/ລບ, ລົງວັນທີ 4/7/2017

7. ການຄຸ້ມຄອງພະນັກງານ-ລັດຖະກອນ

        ລັດຖະບານ ເປັນຜູ້ຄຸ້ມຄອງພະນັກງານ-ລັດຖະກອນຢ່າງລວມສູນ ເປັນເອກະພາບໃນຂອບເຂດທົ່ວປະເທດ ໂດຍມອບການແບ່ງຂັ້ນຄຸ້ມຄອງ ໃຫ້ກະຊວງ, ອົງການລັດທຽບເທົ່າກະຊວງ, ອົງການປົກຄອງຂັ້ນແຂວງ ແລະ ຂັ້ນເມືອງ.

        - ລັດຖະບານມອບໃຫ້ຄະນະຈັດຕັ້ງສູນກາງພັກ ແລະ ກະຊວງພາຍໃນ ເປັນເສນາທິການກ່ຽວກັບການຄຸ້ມຄອງພະນັກງານ-ລັດຖະກອນ ຕາມພາລະບົດບາດຂອງຕົນ.

        - ໃນການຄຸ້ມຄອງພະນັກງານ-ລັດຖະກອນ ກະຊວງ, ອົງການລັດທຽບເທົ່າກະຊວງໂດຍແມ່ນກົມຈັດຕັ້ງ ແລະ ພະນັກງານ ເປັນເສນາທິການ.

        - ໃນການຄຸ້ມຄອງພະນັກງານ-ລັດຖະກອນອົງການປົກຄອງແຂວງ,ນະຄອນ ຫຼວງ ໂດຍແມ່ນຄະນະຈັດຕັ້ງ, ພະແນກພາຍໃນແຂວງ, ນະຄອນຫຼວງ ເປັນເສນາທິການ.

        - ໃນການຄຸ້ມຄອງພະນັກງານ-ລັດຖະກອນ ອົງການປົກຄອງເມືອງ, ເທດສະ ບານ, ນະຄອນໂດຍແມ່ນ ຄະນະຈັດຕັ້ງ, ຫ້ອງການພາຍໃນເມືອງ, ເທດສະບານ, ນະ ຄອນ ເປັນເສນາທິການ.

8.  ຫຼັກການໃນການຄຸ້ມຄອງພະນັກງານ-ລັດຖະກອນ

 

       ການຄຸ້ມຄອງພະນັກງານ-ລັດຖະກອນຕ້ອງຮັບປະກັນຕາມຫຼັກການພື້ນຖານ ດັ່ງນີ້:

 

1.    ຖືກຕ້ອງ, ສອດຄ່ອງກັບລັດຖະທຳມະນູນ, ກົດໝາຍ ແລະ ນະໂຍບາຍຂອງລັດ

2.    ລວມສູນເປັນເອກະພາບໃນຂອບເຂດທົ່ວປະເທດບົນພື້ນຖານການແບ່ງຂັ້ນຄຸ້ມຄອງ, ແບ່ງຄວາມຮັບຜິດຊອບ ແລະ ປະສານສົມທົບລະຫວ່າງຂະແໜງການສູນກາງ ແລະ ທ້ອງຖິ່ນ

3.    ລວມສູນປະຊາທິປະໄຕ, ປຶກສາຫາລືຕົກລົງເປັນຫມູ່ຄະນະ, ບຸກຄົນຮັບຜິດຊອບ, ສຽງສ່ວນໜ້ອຍຂຶ້ນກັບສຽງສ່ວນຫຼາຍ,​ບຸກຄົນຂຶ້ນກັບການຈັດຕັ້ງ ແລະ ຂັ້ນລຸ່ມຂຶ້ນກັບຂັ້ນເທິງ.

4.    ບັນຈຸ, ສ້າງ ແລະ ພັດທະນາພະນັກງານ-ລັດຖະກອນໃຫ້ມີຄຸນນະພາບ, ຖືກຕ້ອງຕາມແນວທາງຂອງພັກ ແລະ ສອດຄ່ອງກັບແຜນພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະ

5.    ໂປ່ງໃສ, ຍຸຕິທຳ, ເປີດເຜີຍ, ພາວະວິໄສ ແລະ ສາມາດກວດສອບໄດ້ໃນການບັນຈຸ, ການຊັບ ຊ້ອນ, ການແຕ່ງຕັ້ງ ຫຼື ເລືອກຕັ້ງ,​ການຄຸ້ມຄອງ, ການນຳໃຊ້ ແລະ ການປະເມີນຜົນການປະຕິບັດວຽກງານຂອງພະນັກງານ-ລັດຖະກອນ.

6.    ມີຄວາມສະເໝີພາບລະຫວ່າງຍິງ-ຊາຍ ແລະ ສົ່ງເສີມຄວາມກ້າວໜ້າລະຫວ່າງແມ່ຍິງລາວທຸກເຜົ່າ.

9. ການສີ້ນສຸດຂອງການເປັນພະນັກງານ-ລັດຖະກອນ

        ການເປັນພະນັກງານ-ລັດຖະກອນຈະສິ້ນສຸດລົງໃນກໍລະນີໃດໜື່ງ ດັ່ງນີ້:

 1.   ການລາອອກ

                ພະນັກງານ-ລັດຖະກອນ ສາມາດລາອອກຈາກການເປັນພະນັກງານ-ລັດຖະກອນ ດ້ວຍຄວາມສະໝັກໃຈໂດຍມີການຮ້ອງຂໍ ແລະ ຮັບອະນຸຍາດຈາກການຈັດຕັ້ງ ຊື່ງຈະໄດ້ຮັບເງີນອຸດໜູນເທື່ອດຽວ.

               ສຳລັບພະນັກງານ-ລັດຖະກອນ ມີອາຍຸຕ່ຳກວ່າ ຫ້າສິບປີ ຫຼື ຢຸດເຊົາວຽກກ່ອນໄດ້ຮັບອະນຸຍາດ ໃຫ້ຖືວ່າເປັນການປ່ອຍລະໜ້າທີ່ ແລະ ຈະບໍ່ໄດ້ຮັບນະໂຍບາຍໃດໆ.

2.    ການເສຍສັນຊາດລາວ

        ພະນັກງານ-ລັດຖະກອນ ທີ່ໄດ້ເສຍສັນຊາດລາວ ຈະສີ້ນສຸດການເປັນພະນັກງານ-ລັດຖະກອນ.

3.    ການປະລະໜ້າທີ່

                ພະນັກງານ-ລັດຖະກອນ ໄດ້ປະລະໜ້າທີ່ຕິດຕໍ່ກັນເກີນໜື່ງເດຶອນ ໂດຍບໍ່ມີເຫດຜົນຈະສິ້ນສຸດການເປັນພະນັກງານ-ລັດຖະກອນ.

               4.  ການຖຶກໄລ່ອອກ

          ພະນັກງານ-ລັດຖະກອນ ທີ່ໄດ້ລະເມິດລະບຽບຢ່າງຮ້າຍແຮງ ຫຼື ໄດ້ກະທຳຜິດທາງອາຍາໂດຍມີຄຳຕັດສີນຂອງສານ ແລະ ໄດ້ມີຂໍ້ຕົກລົງໃຫ້ອອກຈາກລັດຖະການແລ້ວຜູ້ກ່ຽວກໍ່ຈະສີ້ນສຸດໃນການເປັນພະນັກງານ-ລັດຖະກອນ.

          5.  ການເສຍກຳລັງແຮງງານ

              ພະນັກງານ-ລັດຖະກອນ ທີ່ຂາດສະມັດຖະພາບແຮງງານ ຫຼື ສະພາວະປົກກະຕິຂອງຈິດໃຈຊື່ງບໍ່ສາມາດປະຕິບັດໜ້າທີ່ທາງລັດຖະການໄດ້ ຕາມການຢັ້ງຢຶນຂອງຄະນະແພດ ຈະສີ້ນສຸດໃນການເປັນພະນັກ ງານ-ລັດຖະກອນ ແລະ ຈະໄດ້ຮັບນະໂຍບາຍຕາມກົດໝາຍ ລະບຽບການປະກັນສັງຄົມ.

         6.  ການຮັບອຸດໜູນບຳນານ

    ພະນັກງານ-ລັດຖະກອນທຸກຄົນ ເມື່ອເຖິງກະສຽນບຳນານແລ້ວ ຕ້ອງໄດ້ຮັບອຸດໜູນບຳນານ ໂດຍບໍ່ຈຳເປັນຕ້ອງຂຽນຄຳຮ້ອງ ຊື່ງການຈັດຕັ້ງບ່ອນຜູ້ກ່ຽວສັງກັດ ເປັນຜູ້ແຈ້ງໃຫ້ຮູ້ກ່ອນລ່ວງໜ້າໜຶ່ງປີ.

             ເງື່ອນໄຂການຮັບອຸດໜູນບຳນານ ຂອງພະນັກງານ-ລັດຖະກອນ ມີດັ່ງນີ້:

             1) ເພດຊາຍ, ເພດຍິງ ທີ່ມີອາຍຸກະສຽນຄົບ ຫົກສິບປີ ສໍາລັບເພດຍີງຈະອອກຮັບອຸດໜູນບໍານານກ່ອນກໍ່ໄດ້ ແຕ່ອາຍຸກະສຽນບໍ່ໃຫ້ຫຼຸດ ຫ້າສິບຫ້າປີ.

             2) ອາຍຸການເຮັດວຽກແຕ່ ຊາວຫ້າປີຂື້ນໄປ.

            ລັດຖະກອນທີ່ຄົບເງື່ອນໄຂ ແລະ ໄດ້ຮັບອະນຸຍາດຮັບອຸດໜູນບຳນານ ຈະໄດ້ຮັບຂັ້ນເງິນເດຶອນເພີ່ມ ຕືມໜຶ່ງຂັ້ນ. ສຳຫຼັບຜູ້ນຳລະດັບສູງ ໄດ້ກຳນົດໄວ້ໃນລະບຽບການຕ່າງຫາກ.

        7.  ການເສຍຊີວິດ

            ພະນັກງານ-ລັດຖະກອນທີ່ເສຍຊີວິດ ຈະສີ້້ນສຸດໃນການເປັນພະນັກງານ-ລັດຖະກອນ ຈະໄດ້ຮັບ ເງີນເດຶອນຕື່ມໜື່ງຂັ້ນ ເພື່ອຄິດໄລ່ເງີນອຸດໜູນເສບຊີວິດ ສຳລັບຜູ້ນຳລະດັບສູງ ໄດ້ກຳນົດໄວ້ໃນລະບຽບການຕ່າງຫາກ.

10. ການພິຈາລະນາຄວາມຜິດຂອງ ພະນັກງານ-ລັດຖະກອນ

        - ຄວາມຜິດຂອງພະນັກງານ-ລັດຖະກອນ ຕ້ອງນຳມາພິຈາລະນາໃນກອງປະຊຸມ.

        - ພະນັກງານ-ລັດຖະກອນ ຜູ້ຖຶກກ່າວຫາຕ້ອງໄດ້ຊີ້ແຈງເຫດຜົນ ແລະ ນຳເອົາຫຼັກຖານມາອ້າງອິງ ເພື່ອປົກປ້ອງຕົນເອງ ກ່ອນຄະນະກຳມະການວິໄນຈະລົງມະຕິ.

        - ພາຍຫຼັງກອງປະຊຸມຂະນະກຳມະການວິໄນ ມີມະຕິແລ້ວ ກໍໃຫ້ສະເໜີປະທານຄະນະກຳມະການວິໄນ ອອກຂໍ້ຕົກລົງ.

        - ພາຍຫຼັງມີຂໍ້ຕົກລົງແລ້ວ ກໍ່ປະກາດຄວາມຜິດ ແລະ ມາດຕະການທາງວິໄນຕໍ່ຜູ້ກ່ຽວແລ້ວແຈ້ງໃຫ້ພາກສ່ວນທີ່ກ່ຽວຂ້ອງຊາບ ແລະ ປະຕິບັດ.

        10.1 ຂັ້ນຕອນການລົງວິໄນ

         1. ຂັ້ນໜື່ງ ຕິຕຽນໂດຍບັນທຶກຄວາມຜິດເປັນຫຼັກຖານ.

         2. ຂັ້ນສອງ ກ່າວເຕືອນໂດຍໃຫ້ຂຽນໃບສຳຫຼວດໂຕເອງ ເເລະ ບັນທຶກຄວາມຜິດໄວ້ເປັນຫຼັກຖານ.

        3. ຂັ້ນສາມ ໂຈະການເລື່ອນຂັ້ນເງິນເດຶອນ ແລະ ການຍ້ອງຍໍ, ຫຼຸດຕຳແໜ່ງບໍລິ ຫານ ຫຼື ຍ້າຍໄປຮັບໜ້າທີ່ອຶ່ນທີ່ມີຕ່ຳແໜ່ງຕ່ຳກ່ວາເກົ່າ, ປົດຕໍາແໜ່ງບໍລິຫານ ພ້ອມທັງບັນທຶກໄວ້ໃນສຳນວນເອກະສານປະຫວັດ ຂອງພະນັກງານ-ລັດຖະ ກອນ.

         4. ຂັ້ນສີ່ ໃຫ້ອອກຈາກລັດຖະການ ໂດຍບໍ່ໄດ້ຮັບນະໂຍບາຍໃດໆ.

        10.2 ກຳນົດເວລາພິຈາລະນາການລົງວິໄນ

            1. ສິບຫ້າວັນ ສຳເລັດຂັ້ນໜື່ງ

          2. ສາມສິບວັນ ສຳເລັດຂັ້ນສອງ

          3. ຫົກສິບວັນ ສຳເລັດຂັ້ນສາມ

          4. ເກົ້າສິບວັນ ສຳເລັດຂັ້ນສີ່

ພະນັກງານ-ລັດຖະກອນ ທີ່ຖຶກງົດປະຕິບັດໜ້າທີ່ຊົ່ວຄາວ ຈະຖືກຕັດເງິນເດືອນພຶ້ນຖານໄວ້ກ່ອນ ຫ້າສິບສ່ວນຮ້ອຍໃນກໍລະນີຄະນະກຳມະການວິໄນ ຫຼື ສານປະຊາຊົນ ພິຈາລະນາເຫັນວ່າຜູ້ກ່ຽວບໍ່ມີຄວາມຜິດຕາມຂໍ້ກ່າວຫາ ຜູ້ກ່ຽວກໍ່ຈະໄດ້ຮັບເງິນເດືອນທີ່ຫັກໄວ້ນັ້ນຄືນທັງໝົດ.

        ພະນັກງານ-ລັດຖະກອນ ທີ່ຖຶກລົງວິໄນຫາກເຫັນວ່າຕົນເອງບໍ່ໄດ້ຮັບຄວາມເປັນທຳແລ້ວຜູ້ກ່ຽວກໍ່ມີສິດສະເໜີໄປຍັງຄະນະກຳມະການຂັ້ນເທີງຖັດນັ້ນ ເພື່ອພິຈາລະນາຄືນໃໝ່ພາຍໃນກຳນົດເວລາ ສາມສິບວັນ ນັບແຕ່ວັນໄດ້ຮັບຂໍ້ຈຕົກລົງເປັນຕົ້ນໄປ.

11. ທັດສະນະຂອງພັກ ແລະ ລັດເຮົາຕໍ່ວຽກງານພະນັກງານ-ລັດຖະກອນ

        ພັກເຮົາຍາມໃດກໍ່ຖືວ່າວຽກງານ-ພະນັກງານມີບົດບາດສຳຄັນທັງແມ່ນຍຸດທະສາດຂອງການປະຕິບັດ  ແລະ  ພະນັກງານເປັນຜູ້ຕັດສິນຜົນໄດ້ຜົນເສຍຂອງວຽກງານທັງເປັນທຶນຮອນອັນປະເສີດຂອງປະເທດຊາດ.

        ທ່ານເລນິນ ຊີ້ແຈ້ງວ່າ : "ໃນປະຫວັດສາດບໍ່ເຄີຍມີຊົນຊັ້ນໃດສາມາດຍາດໄດ້ອຳນາດການປົກຄອງ ຖ້າບໍ່ສາມາດສ້າງໄດ້ຖັນແຖວຂອງຕົນບັນດາຜູ້ນຳທາງການເມືອງ , ບັນດາຕົວແທນ ທີ່ມີຄວາມສາມາດພຽງພໍໃນການຈັດຕັ້ງ ແລະ ນຳພາຂະບວນການ ".

        ເມື່ອໄດ້ອຳນາດການປົກຄອງແລ້ວ ກ້າວສູ່ວຽກງານກໍ່ສ້າງສັງຄົມໃໝ່ ທ່ານເລນິນໄດ້ຢັ້ງຢືນວ່າ " ຄົ້ນຄວ້າບຸກຄົນເພື່ອຊອກຫາພະນັກງານທີ່ມີຄຸນທາດ ນີ້ແມ່ນ ບັນຫານ້ຳເບີໜຶ່ງໃນປະຈຸບັນຖ້າບໍ່ ດັ່ງນັ້ນຈະເຮັດໃຫ້ຄຳສັງ , ມະຕິຕົກລົງທັງໝົດເປັນພຽງແຕ່ກອງເຈ້ຍເສດເທົ່ານັ້ນ " .

        ບົດຄວາມສໍາຄັນຂອງວຽກງານພະນັກງານ ໃນພາລະກິດປະຕິວັດຢູ່ຫວຽດຍາມປະທ່ານ ໂຮ່ຈິມິນຂຽນວ່າ : " ພະນັກງານແມ່ນອັນເປັນກົກຂອງທຸກວຽກງານ " ວຽກງານຈະປະສົບຜົນສຳເລັດ ຫຼື ປະລາໄຊກໍ່ມາຈາກພະນັກງານດີ ຫຼື ອ່ອນ.

        ທ່ານ ໄກສອນ ພົມວິຫານ ອາດີດປະທານພັກໄດ້ໃຫ້ທັດສະນະຕໍ່ວຽກງານພັກ - ພະນັກງານວ່າ: ບັນຫາຂໍກະແຈຕົ້ນຕໍທີ່ມີຄວາມໝາຍຕັດສິນໃນການຈັດຕັ້ງປະຕິບັດທຸກແນວທາງນະໂຍບາຍຂອງພັກຢ່າງມີໄຊນັ້ນແມ່ນພັກຕ້ອງອອກແຮງບຳລຸງແລະກໍ່ສ້າງຖັນແຖວພະນັກງານໃຫ້ເຂັ້ມແຂງໜັກແໜ້ນໃນທຸກດ້ານ.

        ດັ່ງນັ້ນ, ວຽກງານພະນັກງານ-ລັດຖະກອນຕ້ອງຮັບປະກັນການຄຸ້ມຄອງວຽກງານດັ່ງກ່າວ ດັ່ງນີ້:

        1. ວຽກງານພະນັກງານຕ້ອງຕິດພັນສະໜິດແໜ້ນກັບແນວທາງ ແລະ ໜ້າທີ່ການເມືອງຂອງພັກ.

        2. ວຽກງານພະນັກງານຕ້ອງຕິດພັນສະນິດແໜ້ນກັບການຈັດຕັ້ງ.

        3. ວຽກງານພະນັກງານຕ້ອງຕິດພັນສະນິດແໜ້ນກັບຂະບວນການປະຕິວັດຂອງມະຫາຊົນ.

        4. ເຊື່ອມຊຶມທັດສະນະຊົນຊັ້ນກຳມະກອນຂອງພັກ, ເສີ່ມຂະຫຍາຍມູນເຊື້ອຮັກຊາດ ແລະ ຄວາມສາມັກຄີປອງດອງຊາດ ໃນວຽກງານພະນັກງານ,

        5. ພັກນຳພາວຽກງານພະນັກງານ ແລະ ຄຸ້ມຄອງຖັນແຖວພະນັກງານ ຢ່າງເປັນເອກະພາບໂດຍກົງຕາມຫຼັກການລວມສູນປະຊາທິປະໄຕ,  ພ້ອມທັງເສີ່ມສ້າງຂະຫຍາຍຄວາມຮັບຜິດຊອບຂອງບັນດາການຈັດຕັ້ງໃນລະບົບການເມືອງ.

ການຄຸ້ມຄອງ , ປ້ອງກັນພະນັກງານຕ້ອງປະຕິບັດຕາມທິດນຳທີ່ວ່າ :

        “ຄຸ້ມຄອງວຽກງານໃດຕ້ອງຄຸ້ມຄອງຄົນໄປພ້ອມ” ພ້ອມກັນນັ້ນກໍ່ປະຕິບັດຕາມການແບ່ງຂັ້ນຄຸ້ມຄອງທີ່ກົມການເມືອງສູນກາງພັກວາງອອກ, ການຄຸ້ມຄອງ ແລະ ປ້ອງກັນພະນັກງານຕ້ອງຕິດພັນກັບການກວດກາ, ການສຶກສາອົບຮົມ, ຊ່ວຍເຫຼືອກໍ່ສ້າງເພື່ອເຮັດໃຫ້ເຂົາເຫັນໄດ້ຈຸດດີອັນເປັນພື້ນຖານທີ່ຈະຕ້ອງໄດ້ເສີມຂະຫຍາຍ  ແລະ ເຫັນໄດ້ຈຸດອ່ອນຂໍ້ຂາດຕົກບົກຜ່ອງຂອງຕົນເພື່ອດັດແປງແກ້ໄຂໃຫ້ທັນເວລາແນໃສ່ປົກປັກຮັກສາ ແລະ ປ້ອງກັນຖັນແຖວພະນັກງານເປັນຢ່າງດີ.