ປະທານ ໄກສອນ ພົມວິຫານ ເວົ້າເຖິງພະນັກງານການນຳ

 ປະທານ ໄກສອນ ພົມວິຫານ ເວົ້າເຖິງພະນັກງານການນຳ

ອຈ.ປອ.ປັນຍາສັກ ແສງອ່ອນແກ້ວ

http://panyasack.blogspot.com  

ຄັດຈາກປື້ມມູນເຊື້ອ 55 ປີ ກ່ຽວກັບວຽກງານຈັດຕັ້ງຂອງພັກປະຊາຊົນປະຕິວັດລາວ. ໜ້າ 21-22

        “ຜູ້ນໍາພາຕ້ອງເປັນແບບຢ່າງໃນທຸກດ້ານເພື່ອໃຫ້ສະມາຊິກພັກຜູ້ອື່ນໆເອົາເປັນແບບຢ່າງ”
        ສິ່ງທີ່ຄວນຫຼີກເວັ້ນໃນຂົງເຂດຄຸນສົມບັດສິນທຳປະຕິວັດແມ່ນ: ປາກຫວານດັ່ງນໍ້າອ້ອຍ, ໃຈສົ້ມດັ່ງໝາກນາວ, ຄວາມເວົ້າບໍ່ສອດຄ່ອງກັບການກະທຳ, ມີແຕ່ໂຄສະນາຄຸນສົມບັດສິນທຳແບບນ້ຳເຕົ້າເປົ່າ, ຕັກເຕືອນສັ່ງສອນຜູ້ອື່ນຕ້ອງເຮັດແນວນັ້ນ, ແນວນີ້, ແຕ່ຕົນເອງຊ້ຳພັດບໍ່ເປັນແບບຢ່າງ.
        ໃຜໆກໍຮູ້ດີວ່າ ຖ້າພະນັກງານຂັ້ນສູງຂອງພັກບໍ່ເປັນແບບຢ່າງທາງດ້ານຄຸນສົມບັດສິນທຳແລ້ວ ມັນກໍຈະສົ່ງຜົນສະທ້ອນບໍ່ດີເຖິງຂັ້ນລຸ່ມ ແລະ ໃນເວລານັ້ນໂລຊິກຂອງການດຳລົງຊີວິດກໍຈະພາໄປສູ່ສະພາວະ ທີ່ວ່າ : “ເຮືອນຮົ່ວມາແຕ່ແປ”
        ບັນດາອິດທິພົນ ແມ່ນເປັນສິ່ງທີ່ສໍາຄັນທີ່ສຸດສໍາລັບຜູ້ນຳ ແຕ່ອິດທິພົນບໍ່ແມ່ນຈະມີເອງໄດ້, ມັນຮຽກຮ້ອງຕ້ອງໄດ້ຜ່ານຂະບວນວິວັດແຫ່ງການສູ້ຊົນ, ຝຶກຝົນຫຼໍ່ຫຼອມຂອງ ແຕ່ລະຄົນ.
        ຢາກໃຫ້ມີອິດທິພົນ ແມ່ນຍາກແທ້, ແຕ່ຢາກໃຫ້ອິດທິພົນເສື່ອມເສຍ ແມ່ນງ່າຍ ທີ່ສຸດ, ພຽງແຕ່ຕົນເອງລະເຫຼີງໄປນາທີດຽວ, ບໍ່ເປັນເຈົ້າຕົນເອງ, ໄດ້ປ່ອຍປະໃຫ້ຊີວິດເປັນ ໄປຕາມກາມມະຕັນຫາ, ສັນຊາດຕະຍານອັນຕໍ່າຊ້າແລ້ວ, ອິດທິພົນເຖິງຈະຫຼາຍປານໃດກໍຈະເສຍໄປຢ່າງປະຈຸບັນທັນດ່ວນ ແລະ ໃນເວລານັ້ນກໍຈະນຳພາມະຫາຊົນໄດ້ຍາກທີ່ສຸດ.

(ຄັດຈາກປື້ມມູນເຊື້ອ 55 ປີ ກ່ຽວກັບວຽກງານຈັດຕັ້ງຂອງພັກປະຊາຊົນປະຕິວັດລາວ. ໜ້າ 21-22)
ວາລະສານກໍ່ສ້າງພັກ, ສະບັບ 245 ກໍລະກົດ 2022