ປະທານ ໄກສອນ ພົມວິຫານ ເວົ້າເຖິງ ທັດສະນະກ່ຽວກັບວຽກງານພະນັກງານ

 ປະທານ ໄກສອນ ພົມວິຫານ ເວົ້າເຖິງ ທັດສະນະກ່ຽວກັບວຽກງານພະນັກງານ

ອຈ.ປອ.ປັນຍາສັກ ແສງອ່ອນແກ້ວ

http://panyasack.blogspot.com

ຄັດຈາກປື້ມມູນເຊື້ອ 55 ປີ ກ່ຽວກັບວຽກງານຈັດຕັ້ງຂອງພັກປະຊາຊົນປະຕິວັດລາວ, ໜ້າທີ 35-36

           ການດັດແປງທັດສະນະໃນການຕີລາຄາ, ການເລືອກເຟັ້ນ, ສັບຊ້ອນ, ນຳໃຊ້ ແລະ ບຳລຸງສ້າງ ພະນັກງານ ແນໃສ່ດູດດຶງ, ນຳໃຊ້ ແລະ ເສີມຂະຫຍາຍຜູ້ມີຄວາມສາມາດ ແລະ ມີຄຸນສົມບັດທີ່ ແທ້ຈິງໄດ້, ອັນນັ້ນເປັນສິ່ງຕັດສິນອັນດັບໜຶ່ງສຳລັບຮັບປະກັນໃຫ້ກົງຈັກທັງກະທັດລັດເບົາບາງ, ທັງມີຄວາມສັກສິດ.

          ມາດຖານສຳລັບພະນັກງານ ເວົ້າລວມແມ່ນຕ້ອງຖືເປັນສຳຄັນທັງດ້ານຄຸນນະພາບ ແລະ ທັງໃນດ້ານຄວາມສາມາດເຮັດຫຼ້ອນໜ້າທີ່ຕົວຈິງຕາມທັດສະນະ ແລະ ຈິນຕະນາການໃໝ່. ໃນການຕີລາຄາພະນັກງານນັ້ນ ກ່ອນອື່ນຕ້ອງເບິ່ງໝາກຜົນແຫ່ງການສາໍເລັດໜ້າທີ່ການເມືອງທີ່ໄດ້ຮັບມອບໝາຍ, ຂະບວນວິວັດແຫ່ງການຝຶກຝົນຫຼໍ່ຫຼອມຄວາມອາດສາມາດບຸກບືນຂຶ້ນຂອງແຕ່ລະຄົນ. ບໍ່ຄວນໃສ່ໃຈເກີນຄວນຕໍ່ພາກສ່ວນຊົນຊັ້ນຕົ້ນກຳເນີດ, ຊີວະປະຫວັດ ອຸປະນິໄສ, ແບບແຜນດຳລົງຊີວິດ, ເວົ້າເຖິງການສັບຊ້ອນພະນັກງານຕ້ອງໃຫ້ເໝາະສົມກັບວຽກ, ເໝາະສົມກັບຄົນ ແນໃສ່ເສີມຂະຫຍາຍ ຄວາມສາມາດ ແລະ ຈຸດດີເດັ່ນຂອງເຂົາ, ສ້າງເງື່ອນໄຂໃຫ້ເຂົາກ້າວໜ້າຂຶ້ນຢ່າງບໍ່ຢຸດຢັ້ງ. ຕ້ອງເບິ່ງວຽກເພື່ອຈັດວາງພະນັກງານໃສ່, ຫາກບໍ່ແມ່ນຈັດຫາວຽກງານໃຫ້ແບບເຫັນແກ່ກັນ. ຕ້ອງຕ້ານ ທຸກປະກົດການຈົ່ງຈຽມ, ເຫັນແກ່ເພື່ອນຝູງ, ຍາດພີ່ນ້ອງ, ເຜົ່າດຽວກັນ ຫຼື ທ້ອງຖິ່ນດຽວກັນ.

----------------------------------

(ຄັດຈາກປື້ມມູນເຊື້ອ 55 ປີ ກ່ຽວກັບວຽກງານຈັດຕັ້ງຂອງພັກປະຊາຊົນປະຕິວັດລາວ, ໜ້າທີ 35-36)

ວາລະສານກໍ່ສ້າງພັກ, ສະບັບ 204 ຕຸລາ 2018