ຊົມເຊີຍ​ວັນປະກາດໃຊ້ລັດຖະທຳມະນູນ​ແຫ່ງ​ ສປປ​ ລາວ​ ຄົບຮອບ​ 32​ ປີ (ບາງຂໍ້ຄິດເຫັນທາງວິຊາການ)

    ຊົມເຊີຍ​ວັນປະກາດໃຊ້ລັດຖະທຳມະນູນ​ ແຫ່ງ​ ສປປ​ ລາວ​ 

ຄົບຮອບ​ 32​ ປີ

ອຈ.ປອ.ປັນຍາສັກ ແສງອ່ອນແກ້ວ

http://panyasack.blogspot.com

#ບາງທັດສະນະຂໍ້ຄິດເຫັນທາງວິຊາການ:

"ເປົ້າໝາຍສຳຄັນ"​ ທຸກລະບຽບການທີ່ວາງອອກມາແລ້ວນັ້ນ ຫລື​ ຈະວາງອອກມາ ຕ້ອງກໍ່ໃຫ້ເກີດປະໂຫຍດຕໍ່ປະເທດຊາດ,​ ສັງຄົມ​ ແລະ​ ປະຊາຊົນ...

#ລັດຖະທຳມະນູນ​ ແລະ​ ​ກົດໝາຍ,... ຢ່າງໜ້ອຍເມື່ອວາງອອກມາແລ້ວ ຫລື​ ປະກາດໃຊ້ແລ້ວ ຕ້ອງສາມາດນຳໄປສູ່:

  1. ໃຫ້ທຸກຄົນ,​ ທຸກພາກສ່ວນໃນສັງຄົມ"ຮູ້"

  2. ໃຫ້ທຸກຄົນ,​ ທຸກພາກສ່ວນໃນສັງຄົມ"ເຂົ້າໃຈ"

  3. ໃຫ້ທຸກຄົນ,​ ທຸກພາກສ່ວນໃນສັງຄົມ "ຕ້ອງສາມາດປະຕິບັດໄດ້"

      ຫາກບໍ່ດັ່ງນັ້ນແລ້ວບັນດາລັດຖະທຳມະນູນ ແລະ ກົດໝາຍ, ລະບຽບການຕ່າງໆ ກໍ່ຈະກາຍເປັນພຽງແຕ່ເຈັຍສໍທີ່ບໍ່ມີປະໂຫຍດ ແລະ ຄວາມສັກສິດໃດໆ

#ລັດຖະທຳມະນູນ,​ ເປັນເຄື່ອງບົ່່ງຊີ້ວ່າ ກົນໄກການໄດ້ມາຂອງອຳນາດແຫ່ງລັດ​ແມ່ນເລີ່ມຈາກປະຊາຊົນ ແລະ​ກໍ່ແມ່ນປະຊາຊົນທີ່ມີບົດບາດສຳຄັນໃນການທີ່ຈະເລືອກເອົາຕົວແທນຂອງຕົນມາເຮັດໜ້າທີ່ສຳຄັນເພື່ອໃຫ້ບໍລິການປະຊາຊົນ ແລະພັດທະນາການດຳລົງຊີວິດຂອງປະຊາຊົນໃຫ້ດີຂື້ນ...

#ແນ່ນອນເມື່ອຜູ້ທີ່ໄດ້ຮັບການມອບໝາຍ ຫລື​ ເປັນຕົວແທນຂອງປະຊົນຊົນແລ້ວ,​ ບໍວ່າຈະຢູ່ໃນຂົງເຂດໃດກໍ່ຕາມ​ (ຂົງເຂດບໍລິຫານ,​ ຂົງເຂດນິຕິບັນຍັດ,​ ຂົງເຂດ​ຕຸລາການ,..​ຫລື​ ທຸກຂະແໝງການຂອງການຈັດຕັ້ງລັດ)​ ກໍ່ຕ້ອງເຂົ້າໃຈຢ່າງເລີກເຊິງສະເໝີວ່າ:

#ເມື່ອເຮົາມີໜ້າທີ່​ ຫລື​ ຖືກບັນຈຸຢູ່ໃນອົງການຈັດຕັ້ງລັດ ຫລື​ ເຮົາປະຕິບັດໜ້າທີ່ຢູ່ໃນອົງການຈັດຕັ້ງຂອງລັດແລ້ວ,​ ກໍ່ສະແດງເຖິງການທີ່ເຮົາຕັດສິນໃຈມາເປັນອາສາສະໝັກເພື່ອມາຮັບໃຊ້ ແລະ​ ບໍລິການປະຊາຊົນ,​ ເພາະອົງການຈັດຕັ້ງຂອງລັດແມ່ນເປັນອົງການຈັດຕັ້ງທີ່ເປັນຕົວແທນໃນແຕ່ລະຂົງເຂດວຽກງານໃຫ້ປະຊາຊົນ....​

#ສິ່ງທີ່ຕ້ອງຄຳນຶງ ແລະ​ເຂົ້າໃຈຢ່າງເດັ່ນຊັດຄືການປົກຄອງ​ນັ້ນ ໃນຫລັກທີ່ແທ້ຈິງຄື: "ການບໍລິການປະຊາຊົນ"​ ຖ້າເຮົາມີຕຳແໜ່ງທີ່ສູງເທົ່າໃດ ນັ້ນກໍ່ໝາຍເຖິງຄວາມຮັບຜິດຊອບໃນການທີ່ຈະບໍລິການປະຊາຊົນກໍ່ຈະສູງ ແລະ​ກວ້າງຂື້ນເທົ່ານັ້ນ...​

#ດັ່ງນັ້ນ,​ ທຸກບົດບາດ ແລະ​ໜ້າທີ່ກໍ່ຄືການປະຕິບັດເພື່ອບໍລິການປະຊາຊົນ ເຊັ່ນວ່າ: ຄູກໍ່ມີໜ້າທີ່ບໍລິການປະຊາຊົນດ້ວຍການສິດສອນໃຫ້ຄວາມຮູ້ຢ່າງສຸດຄວາມສາມາດ,​ ແພດໝໍກໍ່ມີໜ້າທີ່ບໍລິການປະຊາຊົນດ້ວຍການປິ່ນປົວຮັກສາດ້ວຍຄວາມຍຸຕິທຳ​ ແລະ​ ເທົ່າທຽມກັນ,​ ທະຫານຕຳຫວດກໍ່ມີໜ້າທີ່ໃນການບໍລິການປະຊາຊົນໃນການປົກປ້ອງ ແລະ​ ຮັກສາຄວາມເປັນລະບຽບຮຽບຮ້ອຍ,​ ສານກໍ່ມີໜ້າທີ່ໃນການພິຈາລະນາພິພາກສາຄະດີດ້ວຍຄວາມຍຸຕິທຳສູງສຸດ...​ແລະ​ໜ້າທີ່ ອື່ນໆ​ ເປັນຕົ້ນ...​ເພາະວ່າເປົ້າໝາຍສູງສຸດແລ້ວກໍຄືການເຮັດໃຫ້ປະເທດຊາດໄດ້ຮັບການພັດທະນາ,​ ປະຊາຊົນມີອາຊີບມີລາຍໄດ້ທີ່ໝັ້ນຄົງ,​ ການດຳລົງຊີວິດຂອງປະຊົນໄດ້ຮັບການພັດທະນາທີ່ດີຂື້ນຢ່າງບໍ່ຢຸດຢັ້ງ ໄປຕາມແນວທາງນະໂຍບາຍຂອງພັກເຊິ່ງກໍຄືຄວາມມຸ້ງມາດປາດຖະນາຂອງປະຊາຊົນທັງຊາດ...