ເຕັກນິກການສ້າງມະນຸດສໍາພັນ

 ປອ. ປັນຍາສັກ ແສງອ່ອນແກ້ວ

    ມະນຸດສຳພັນຄືຍຸດທະວິທີສ້າງຄວາມສໍາພັນອັນດີລະຫວ່າງເພື່ອມະນຸດ ໃຫ້ມາເຮັດກິດ ຈະກຳຮ່ວມກັນແບບເຕັມໃຈ ແລະ ບຸກຄົນ ທີ່ມີມະນຸດສຳພັນກໍ່ຈະເປັນບຸກຄົນທີ່ສາມາດເຂົ້າກັບຜູ້ອື່ນໄດ້ງ່າຍ, ມີຈິດໃຈສາທາລະນະເປັນທີ່ຮັກແພງຂອງຜູ້ອື່ນ, ໃຜເຫັນໃຜກໍ່ຮັກ ແລະ ຢ່າກຢູ່ນໍາ, ມະນຸດສຳພັນຈຶ່ງກ່ຽວຂ້ອງກັບຄວາມຕ້ອງການຂອງບຸກຄົນ, ແຮງຈູງໃຈ ຫຼື ສາເຫດພາຍໃນຂອງບຸກຄົນທີ່ເຂົ້າມາເຮັດກິດຈະກຳຕ່າງໆ ໃຫ້ບັນລຸເປົ້າໝາຍລວມທັງການສາມາດເອົາຊະນະຈິດໃຈຜູ້ອື່ນໃຫ້ຄ້ອຍຕາມຈົນສາມາດເຮັດວຽກນັ້ນໄດ້ສຳເລັດ.

ຫຼັກການສ້າງມະນຸດສໍາພັນ

(1) ຫຼັກການສ້າງມະນຸດສໍາພັນກັບຜູ້ນໍາ

    1. ຮູ້ໃຈ ແລະ ຮູບແບບການເຮັດວຽກຂອງຜູ້ນໍາ.      
    2. ຊອກຫາໂອກາດທີ່ເຫມາະສົມເພື່ອເຂົ້າຫາຜູ້ນໍາ.
    3. ໃຫ້ກຽດການຕັດສິນໃຈຂອງຜູ້ນໍາ.
    4.ເຮັດວຽກດີດ້ວຍຄວາມພາກພຽນ.
    5. ບໍລິຫານເວລາໃຫ້ມີປະສິດທິພາບ.

(2) ຫຼັກການສ້າງມະນຸດສໍາພັນກັບຜູ້ໃຕ້ບັງຄັບບັນຊາ

    1. ສັ່ງງານຢ່າງຊັດເຈນ ແລະ ໃຫ້ມີຂໍ້ ແນະນຳ ໃຫ້ປະຕິບັດຕາມແນວທາງປະຕິບັດຕ່າງໆ.
    2. ແນະນໍາ ສອນຫຼັກການ ແລະ ວິທີການປະຕິບັດຢ່າງໃກ້ຊິດ.
    3. ຕິດຕາມຄວາມຄືບໜ້າຂອງວຽກງານ ຖາມບັນຫາ, ອຸປະສັກ ແລະ ແກ້ໄຂບັນຫາ.
    4. ຍົກຍ້ອງ, ຊົມເຊີຍ ຕໍ່ໜ້າຄົນອື່ນເມື່ອເຂົາປະຕິບັດວຽກງານດີ ເມື່ອເຮັດຜິດໃຫ້ສອບຖາມສາເຫດເປັນການສ່ວນຕົວ.
    5. ຈັດປະຊຸມຕາມສົມຄວນ ເພື່ອຊີ້ແຈ້ງວຽກງານ, ແຜນງານ, ນະໂຍບາຍ ແລະ ຮັບຟັງບັນຫາຕ່າງໆ.
    6. ຮັບຟັງຄວາມຄິດຄວາມເຫັນຂອງຜູ້ຢູ່ໃຕ້ບັງຄັບບັນຊາ, ກະຕຸ້ນໃຫ້ເຂົາສະເໜີຄວາມຄິດເຫັນ.
    7. ພະຍາຍາມໃຫ້ຜູ້ຢູ່ໃຕ້ບັງຄັບບັນຊາໄດ້ມີສ່ວນຮ່ວມໃນການຕັດສິນໃຈໃນເລື່ອງຕ່າງໆຕາມຄວາມເໝາະສົມ.
    8. ໃຫ້ຂໍ້ຄິດ, ຂໍ້ແນະນໍາ ເປັນທີ່ປຶກສາ.
    9. ຍຸຕິທຳ ບໍ່ລຳອຽງ, ປະຕິບັດຕໍ່ຜູ້ຢູ່ໃຕ້ບັງຄັບບັນຊາໂດຍເທົ່າທຽມກັນ.
    10. ສົ່ງເສີມ ແລະ ສະໜັບສະໜູນໃຫ້ເຂົາໄດ້ພັດທະນາຄວາມຮູ້ຄວາມສາມາດຢ່າງຍຸຕິທຳ.
    11. ສົນໃຈ ເບີ່ງແຍງຖານະ ແລະ ໂອກາດ ຄວາມກ້າວໜ້າທາງດ້ານວຽກງານຢູ່ສະເໜີ.
    12.ໃຫ້ການຊ່ວຍເຫຼືອຕາມສົມຄວນ.
    13. ປະຕິບັດເຂົາດ້ວຍຄວາມສຸພາບ ໃຫ້ກຽດໃນຖານະເພືອນຮ່ວມງານ.

ຄຸນລັກສະນະການສ້າງມະນຸດສໍາພັນ

        ການສ້າງມະນຸດສໍາພັນໃຫ້ໄດ້ຮັບຄວາມສໍາເລັດນັ້ນມີຄຸນລັກສະນະຫຼາຍຢ່າງທີ່ຕ້ອງຄໍານຶງເຖີງໃນການປັບປຸງ, ແກ້ໄຂ ແລະ ສ້າງໃຫ້ເກີດຂື້ນໃນແຕ່ລະບຸກຄົນ. ລັກສະນະມະນຸດສຳພັນດີມີດັ່ງຕໍ່ໄປນີ້:
    1. ການມີທ່າທາງ ທີ່ມີລັກສະນະເຂົ້າກັບຄົນ, ກິລິຍາມາລະຍາດຮຽບຮ້ອຍ, ການເວົ້າຈາແບບເປັນກັນເອງເຮັດໃຫ້ຜູ້ທີ່ຄົບຫາມີຄວາມສະບາຍໃຈ.
    2. ບຸກຄະລິກຮູບຮ່າງ, ໜ້າຕາ, ການແຕ່ງກາຍ, ການເຄື່ອນໄຫວ, ກິລິຍາທ່າທາງ, ການເວົ້າຈາ.
    3. ຄວາມເປັນເພື່ອນໝູ່ຄູ່ສະນິດສະໜົມກັນໄດ້ງ່າຍ ແລະ ເປັນກັນເອງ.
    4. ຄວາມອ່ອນນ້ອມລວມທັງກິລິຍາມາລະຍາດສຸພາບ, ອ່ອນນ້ອມຖອມຕົນ.
    5. ມີນໍ້າໃຈຊ່ວຍເຫຼືອ, ເຕັມໃຈຊ່ວຍເຫຼືອຜູ້ອື່ນ, ຊ່ວຍດ້ວຍກຳລັງກາຍ, ກຳລັງຄວາມຄິດ, ກຳລັງເງິນ ທີ່ມີລັກສະນະເອື້ອເຟື້ອເພື່ອແຜ່.
    6. ການໃຫ້ຄວາມຮ່ວມມື ໃນການເຮັດວຽກງານກັບຜູ້ອື່ນ, ບໍ່ເຫັນແກ່ຕົວ, ເຫັນປະໂຫຍດສ່ວນລວມສໍາຄັນ ແລະ ໃຫ້ການຊ່ວຍເຫຼືອ.
    7. ການມີຄວາມກະລຸນາເອື້ອເຟື້ອ, ນໍ້າໃຈໂອ້ບອ້ອມອາລີແກ່ຜູ້ທີ່ໄດ້ຮັບຄວາມທຸກຍາກ ແລະ ຄົນທົ່ວໄປ.
    8. ເປັນຄົນມີປະໂຫຍດຊ່ວຍເຫຼືອວຽກຜູ້ອື່ນ (ຫຼື ສັງຄົມ) ໂດຍບໍ່ຄໍານຶງເຖິງສິ່ງຕອບແທນ, ສ້າງປະໂຫຍດແກ່ສັງຄົມ ບໍ່ວ່າຈະເປັນທາງຄວາມຄິດ, ກຳລັງກາຍ ຫຼື ກຳລັງຊັບ.
    9. ການສ້າງສີສັນ ໝາຍເຖິງມີຄວາມຄິດ ແລະ ການກະທໍາທີ່ສ້າງສັນ, ບໍ່ແມ່ນຄວາມຄິດທີ່ຫວັງທຳລາຍ ຫຼື ປິດກັ້ນ, ຖ່ວງຄວາມຈະເລີນກ້າວໜ້າຂອງຜູ້ອື່ນ.
    10. ການມີອາລົມດີ, ການຄວບຄຸມ ແລະ ການໃຊ້ອາລົມໄດ້ເໝາະສົມ.
    11. ມີຄວາມກະຕືລືລົ້ນຄືຄວາມມີຊີວິດຈິດໃຈບໍ່ໂສກເສົ້າ, ເບີກບານແຈ່ມໃສ.
    12. ມີຄວາມຮັບຜິດຊອບຕໍ່ວຽກງານ. ການເວົ້າ, ການນັດໝາຍ ແມ່ນການຮັກສາເວລາ, ເຮັດໃຫ້ເປັນຜູ້ທີ່ມີກຽດ ແລະມີຄວາມຊື່ສັດສຸດຈະລິດ.
    13. ມີຄວາມອົດທົນຕໍ່ຄວາມອິດເມື່ອຍ, ຄວາມລຳບາກ, ອົດທົນຕໍ່ກິລິຍາທ່າທາງ, ການກະທໍາ ແລະ ຄໍາເວົ້າທີ່ບໍ່ມ່ວນຫູ.
    14. ມີຄວາມດຸໝັ້ນຂະຫຍັນພຽນຕໍ່ການເຮັດວຽກງານ, ຕໍ່ພະລະໜ້າທີ່ຄວາມຮັບພິຊອບ, ບໍ່ເປັນຄົນຂີ້ຄ້ານ….
    15. ມີຄວາມພະຍາຍາມພາກພຽນທີ່ຈະພັດທະນາໃຫ້ຕົນເປັນຄົນທີ່ມີຄຸນສົມບັດທາງດ້ານມະນຸດສໍາພັນຢ່າງບໍ່ທໍ້ຖອຍ, ພະຍາຍາມປັບປຸງແກ້ໄຂຕົນເອງຢູ່ສະເໝີ, ພະຍາຍາມເອົາຊະນະໃຈຄົນ ແລະ ອຸປະສັກຕ່າງໆອັນຈະເປັນຫົນທາງນໍາໄປສູ່ຄວາມສຳເລັດທີ່ດີ.
    16. ມີໄຫວພິບ ແລະ ຄວາມສະຫຼາດໃນການສ້າງບັນຍາກາດຄວາມສໍາພັນກັບຄົນອື່ນ, ພັດທະນາໃຫ້ມີການເວົ້າ, ການສະເໜີຄວາມຄິດຄວາມເຫັນໃຫ້ຖືກກັບກາລະໂອກາດ.

ທິດສະດີກ່ຽວກັບການສ້າງມະນຸດສໍາພັນ

        ມະນຸດສຳພັນເປັນຍຸກທີ່ເຊື່ອກັນວ່າວຽກໃດຈະສຳເລັດໄດ້ຕ້ອງອາໄສຄົນເປັນຫຼັກ, ຜູ້ບໍລິຫານກຸ່ມນີ້ຈຶ່ງຫັນມາສົນໃຈສຶກສາ ແລະ ພັດທະນາທິດສະດີ. ວິທີການ ແລະ ເຕັກນິກຕ່າງໆໃນວິທະຍາສາດສັງຄົມ ພຶດຕິກຳ ແລະ ຄົນໃນອົງກອນ ມີຄວາມສົນໃຈໃນການສຶກສາວິທີການປະສານງານ ເຮັດໃຫ້ຄົນເຂົ້າກັນໄດ້ກັບສະພາບແວດລ້ອມການເຮັດວຽກ, ເພື່ອຫວັງໃຫ້ໄດ້ຮັບໝາກຜົນໃນການຮ່ວມມື, ຂໍ້ລິເລີ່ມ ແລະ ເພີ່ມທະວີການຜະລິດຕາມຄວາມເຊື່ອຖືດັ່ງກ່າວ "ການພົວພັນຂອງມະນຸດ" ຈະນໍາໄປສູ່ຄວາມພໍໃຈ ແລະ ສະທ້ອນໃຫ້ເຫັນຜົນໄດ້ຮັບຂອງການປະຕິບັດວຽກງານ. 
        Mary Parker Follette ໄດ້ຂຽນປື້ມທີ່ມີແນວຄວາມຄິດກ່ຽວກັບການພົວພັນຂອງມະນຸດ, ເຊັ່ນການຂຽນກ່ຽວກັບຄວາມຂັດແຍ້ງ. ການປະສານງານຄວາມຂັດແຍ້ງ, ກົດລະບຽບໂດຍອີງໃສ່ສະຖານະການ ແລະ ຄວາມຮັບຜິດຊອບ ແລະອື່ນໆ Follette ໄດ້ນໍາໃຊ້ຈິດຕະວິທະຍາ ແລະ ໄດ້ສະເຫນີ 3 ວິທີການແກ້ໄຂຂໍ້ຂັດແຍ່ງ (Conflict) ດັ່ງຕໍ່ໄປນີ້.
    1. ການຄອບຄອງ ໝາຍເຖິງ ການໃຊ້ອຳນາດຂອງຄົນອື່ນເພື່ອປາບປາມ. ນັ້ນແມ່ນ, ປ່ອຍໃຫ້ອີກຝ່າຍສູນເສຍແມ່ນບໍ່ດີ.
    2. ການປະນີປະນອມ ໝາຍເຖິງ ການໄປເຄິ່ງທາງເພື່ອສະຫງົບສະຖານະການໂດຍການປະນີປະນອມ.
    3. ການປະສົມປະສານ ແມ່ນຊອກຫາວິທີການທີ່ບໍ່ມີໃຜສູນເສຍ. ມັນໄດ້ຮັບຜົນປະໂຫຍດທັງສອງທາງ (ຊະນະ, ຊະນະ) ນອກຈາກນັ້ນ, Follette ໃຫ້ທັດສະນະທີ່ຫນ້າສົນໃຈ: “ການເກີດຄວາມຂັດແຍ່ງກັນຢູ່ພາຍໃນອົງການແມ່ນ ຂາດການບໍລິຫານ”.

ການສ້າງແຮງຈູງໃຈ

(1) ການສ້າງແຮງຈູງໃຈດ້ານຜູ້ນໍາ

        1. ເຮັດໃຫ້ພະນັກງານມີຄວາມຮູ້ສຶກເປັນສ່ວນຫນຶ່ງຂອງອົງການຈັດຕັ້ງຄືກັບການເປັນຫຸ້ນສ່ວນ ຫຼື ຄູ່ຮ່ວມງານທຸລະກິດເວົ້າງ່າຍໆຄືກັບການເປັນເຈົ້າຂອງ.
        2. ມີຄວາມໂປ່ງໃສ ໝາຍຄວາມວ່າການສື່ສານທີ່ຊັດເຈນ, ຫ້າມປິດບັງເລື່ອງທີ່ຄວນເປີດເຜີຍເຊັ່ນ: ຂ່າວພາຍໃນອົງການ ແລະ ພາຍນອກທີ່ກ່ຽວຂ້ອງກັບອົງການອື່ນໆ.
        3. ຢ່າຢ້ານທີ່ຈະໃຫ້ເຂົາເຈົ້າເຮັດກັບວຽກງານໃໝ່ໆ ຖ້າທ່ານຕ້ອງການໃຫ້ພວກເຂົາພັດທະນາຕົນເອງນີ້ແມ່ນໂອກາດທີ່ເໝາະສົມ.
        4. ປະຕິບັດຕໍ່ພະນັກງານດ້ວຍຄວາມເຄົາລົບ, ມີຄວາມສະເໝີພາບ, ໃນບ່ອນເຮັດວຽກເຈົ້າອາດຈະເປັນຜູ້ນຳ ແລະ ຜູ້ໃຕ້ບັງຄັບບັນຊາ ແຕ່ຢູ່ນອກບ່ອນເຮັດວຽກທຸກຄົນແມ່ນພຽງແຕ່ມະນຸດ.
        5. ຮັບຟັງຄວາມຄິດເຫັນຂອງພະນັກງານ ທັດສະນະຄະຕິຕໍ່ຜູ້ບໍລິຫານ, ສະພາບແວດລ້ອມການເຮັດວຽກວຽກທີ່ມີຄວາມຮັບຜິດຊອບສິ່ງທີ່ຄວນເຮັດ ແລະ ສິ່ງທີ່ບໍ່ຄວນເຮັດ.

(2) ການສ້າງແຮງຈູງໃຈດ້ານຜູ້ໃຕ້ບັງຄັບບັນຊາ

        1. ດັ່ງທີ່ເຮົາຮູ້ຢູ່ໃນອົງກອນ, ພວກເຮົາບໍ່ພຽງແຕ່ມາເຮັດວຽກ. ການພົບປະກັບຜູ້ຮ່ວມງານເປັນອີກການກະຕຸ້ນທີ່ຍິ່ງໃຫຍ່, ບາງຄັ້ງເຮົາອາດຈະຕ້ອງເຮັດໜ້າທີ່ເປັນທີ່ປຶກສາໃຫ້ກັບເພືອນຮ່ວມງານຂອງເຮົາ. ມີຜົນການສໍາຫຼວດສະແດງໃຫ້ເຫັນວ່າການຊ່ວຍເຫຼືອຄົນອື່ນ 10-30 ນາທີຕໍ່ມື້ຈະຊ່ວຍໃຫ້ທ່ານຮູ້ສຶກດີຂຶ້ນ.
        2. ເຂົ້າຮ່ວມໂຄງການ ຫຼື ການຝຶກອົບຮົມທັກສະຕ່າງໆ ນີ້ແມ່ນໂອກາດຂອງທ່ານໃນການພັດທະນາຕົວທ່ານເອງ ແລະ ຕໍ່ຍອດການເຮັດວຽກງານຕໍ່ໄປອີກ.
        3. ເພື່ອສ້າງແຮງຈູງໃຈໃນການເຮັດວຽກ ໃນແຕ່ລະມື້ທ່ານຄວນຕັ້ງເປົ້າໝາຍທັງໄລຍະສັ້ນ ແລະ ໄລຍະຍາວ.  ເປົ້າໝາຍເຫຼົ່ານີ້ແມ່ນວຽກທີ່ເຈົ້າເຮັດສຳເລັດທຸກໆມື້ ເຊັ່ນວ່າເຈົ້າຈໍາເປັນຕ້ອງເຮັດມື້ນີ້ໄດ້ຈັກຢ່າງ, ກຽມເອກະສານກອງປະຊຸມໃຫ້ສຳເລັດພາຍໃນເວລາຊົ່ວໂມງ?  ແລະ ອື່ນໆ.
        4. ໃຫ້ລາງວັນຕົນເອງ ແລະ ຍ້ອງຍໍຄົນອື່ນ ໃນເວລາທີ່ທ່ານເຮັດວຽກບັນລຸເປົ້າໝາຍຂອງທ່ານ ທ່ານຄວນໃຫ້ລາງວັນຕົວເອງງ່າຍໆ ເຊັ່ນ: ກິນຂອງແຊບໆ, ຊື້ເສື້ອງາມໆ, ອື່ນໆ ແລະ ເມື່ອຄົນອື່ນເຮັດສິ່ງທີ່ດີຄວນຈະໄດ້ຮັບການຍ້ອງຍໍ ເພາະວ່າຄຳຍ້ອງຍໍຂອງເຮົາອາດຈະສ້າງແຮງບັນດານໃຈໃຫ້ເຂົາ.
        5. ສ້າງຄວາມສຳພັນທີ່ດີກັບເພື່ອນຮ່ວມງານ ການມາເຮັດວຽກໃນແຕ່ລະມື້ເຈົ້າບໍ່ໄດ້ຢູ່ຄົນດຽວໃນໂລກແຕ່ມີຄົນອື່ນທີ່ກ່ຽວຂ້ອງກັບວຽກງານອື່ນໆຈໍານວນຫຼາຍ ເຊິ່ງເພື່ອນຮ່ວມງານໃນມື້ນີ້ອາດຈະເປັນເພືອນທີ່ສະໜິດໃນອະນາຄົດກໍ່ເປັນໄດ້. ມີຜົນການສໍາຫຼວດສະແດງໃຫ້ເຫັນວ່າມິດຕະພາບທີ່ດີລະຫວ່າງເພືອນຮ່ວມງານມັນຈະຊ່ວຍໃຫ້ການເຮັດວຽກມີປະສິດທິພາບຫຼາຍຂຶ້ນ.

ການສ້າງຄວາມສໍາພັນກັບຜູ້ນຳກັບຜູ້ໃຕ້ບັງຄັບບັນຊາ

(1) ການສ້າງຄວາມສໍາພັນກັບຜູ້ນຳ

1. ຮຽນຮູ້ນິໄສໃຈຄໍຫົວໜ້າ.

2. ເຮັດວຽກໃຫ້ດີຫຼີກລ້ຽງການເອາະເຊາະ, ປະຈົບປະແຈງ, ການເຮັດວຽກໃຫ້ດີມີຫຼາຍໆຢ່າງບາງເທື່ອດີສໍາລັບເຮົາ, ແຕ່ບໍ່ດີສໍາລັບຫົວໜ້າ. 

3. ຫາທາງເຮັດໃຫ້ຄວາມຄິດຂອງຫົວໜ້າເປັນຈິງ.

4. ໃຫ້ຄວາມເຄົາລົບ ແລະ ນັບຖືຫົວໜ້າຕາມຖານະ.

5. ຢ່າລົບກວນຫົວໜ້າໃນເລື່ອງເລັກໆນ້ອຍໆ ການປະຕິບັດວຽກງານຍ່ອມມີຄວາມຮັບຜິດຊອບທີ່ແຕກຕ່າງກັນໄປຕາມໜ້າທີ່ຕຳແໜ່ງຂອງໃຜລາວ. 

6. ເຂົ້າຫາຜູ້ບັງຄັບບັນຊາ ຫຼື ຫົວໜ້າໃຫ້ເໝາະສົມກັບໂອກາດ ແລະ ເວລາ.

7. ຢ່ານິນທາ ຫຼື ຈົ່ມຂັວນຫົວໜ້າລັບຫຼັງ.

8. ສະແດງຄວາມຂອບໃຈ ເມື່ອມີຜູ້ບັງຄັບບັນຊາ ຫຼື ຫົວໜ້າປະຕິບັດຕໍ່ເຮົາ.

9. ສັນລະເສີນ ຄຸນງາມຄວາມດີຂອງຫົວໜ້າໃນໂອກາດອັນເໝາະສົມ.

10. ຢ່າຈົ່ມວ່າຄວາມລຳບາກຕໍ່ໜ້າຫົວໜ້າ.

11. ຕີລາຄາຈຸດດີ, ຈຸດອ່ອນຂອງຕົນເອງວ່າຜ່ານມາຕົນເອງມີຂໍ້ດີ ແລະ ຂໍ້ເສຍຫຍັງແດ່. ປະເມີນທຸກໆມື້ ຍິ່ງເປັນການດີ. ຖ້າເປັນຂໍ້ເສຍກໍ່ຈະຕ້ອງໄດ້ແກ້ໄຂ. ເຮົາຈະບໍ່ເບິ່ງເຫັນຈຸດອ່ອນຂອງຕົນເອງ, ອາດຈະຕ້ອງໃຫ້ຄົນອື່ນຊ່ວຍສັງເກດ ແລະ ຮັບຄໍາຕຳນິຕິຊົມເພື່ອການປັບປຸງແກ້ໄຂ.

(2) ການສ້າງຄວາມສໍາພັນກັບຜູ້ໃຕ້ບັງຄັບບັນຊາ

1.  ຮູ້ຈັກຄວບຄຸມອາລົມ.

2. ຮູ້ຈັກສົ່ງເສີມໃຫ້ກຳລັງໃຈລູກນ້ອງ.

3. ຮູ້ຈັກຍ້ອງຍໍຊົມເຊີຍ ແລະ ໃຫ້ລາງວັນ…ຄວາມດີຂອງລູກນ້ອງ.

(3) ການສ້າງສາຍສໍາພັນກັບເພືອນຮ່ວມງານ

1. ຈະຕອ້ງເປັນຜູ້ທັກທາຍຕິດຕໍ່ກອ່ນ ຫຼື ເຂົ້າຫາກ່ອນ…

2. ມີຄວາມຈິງໃຈຕໍ່ເພືອນຮ່ວມງານ…

3. ຫລີກລຽ້ງການນິນທາເພືອນຮ່ວມງານ….

4. ຢ່າໂຍນຄວາມຜິດໃຫ້ກັບເພືອນຮ່ວມງານ…

5. ຍົກຍ້ອງ ແລະ ຊົມເຊີຍເພືອນຕາມຄວາມເໝາະສົມ…. 

6. ໃຫ້ຄວາມຮ່ວມມືໃນກິດຈະກຳຂອງເພືອນຮ່ວມງານດ້ວຍຄວາມເຕັມໃຈສະເໝີ…

7. ໃຫ້ເພືອນຮ່ວມງານຮັບຮູ້ໃນເລື່ອງທີ່ເຂົ້າຮັບຜິດຊອບ ແລະ ກ່ຽວຂ້ອງຢູ່…

8. ຮູ້ຈັກການຮັບຟັງຄວາມຄິດເຫັນຂອງເພືອນຮ່ວມງານ…

9. ຫລີກລຽ້ງການປະຕິບັດຕົນເອງສູງກວ່າເພືອນຮ່ວມງານ…

10. ປະຕິບັດຕົນເອງໃຫ້ມີຄວາມສະເໝີຕົ້ນສະເໝີປາຍ…

11. ໃຈກວ້າງ ແລະ ເອື້ອເຟືອເພື່ອແຜ່ກັບເພືອນຮ່ວມງານທຸກຄົນ…

12. ອອກໄປພົບປະສ້າງສັນກັບໝູ່ເພືອນບາງຄັ້ງຄາວຕາມຄວາມເໝາະສົມ…

13. ໃຫ້ຄວາມເຫັນອົກເຫັນໃຈຊ່ວຍເຫຼືອເພືອນຮ່ວມງານໃນຍາມທຸກຮ້ອນ…